Kelenn ar brezhoneg zo unan eus an oberoù pennañ da seveniñ evit delc'her ar yezh en amzer-da-zont. Ul lodenn vat eus obererezhioù an Ofis Publik a ya da frammañ ha da reiñ lañs d'an doareoù da dreuzkas ar brezhoneg er skolioù.
Taolenn
- Ar c'helenn brezhoneg er gwir
- Emglev Stad-Rannvro 2022-2027
- Kavit ho skol gant al lusker enklask
- Kavit ho skol divyezhek war ur gartenn etreoberiat
- Ar c'helenn divyezhek
- Skolajoù ha liseoù gant hentadoù divyezhek
- Ar c'helenn brezhoneg
- Kartenn skolajoù ha liseoù - danvez dibab ha Yezh vev
- Mont da gelenner
- Dafar kelenn
Ar c'helenn brezhoneg er gwir
Abaoe un 10 vloaz bennak ez eus muioc’h-mui a skridoù lezennel ha reolennadurel a bled gant ar brezhoneg, klikit amañ.
Emglev Stad-Rannvro 2022-2027
Amañ e c'hellit pellgargañ an emglev sinet etre ar Stad ha Rannvro Breizh evit ar prantad 2022-2027. Diouzh an emglev-se eo bet savet ar Stignad Strizh Boutin Kendoniañ, ennañ ar Stad, ar rannvro ha 4 departamant Akademiezh Roazhon. Buhezet eo labour an SSBK gant an OPAB hag unan eus e gefridifoù zo diorren kinnig ar c'helenn divyezhek diouzh ur steuñv diorren (da bellgargañ amañ) hag ur programmadur a zo nevesaet bep 2 vloaz.
Kavit ho skol gant al lusker enklask
Evit pellgargañ roll ar skolioù divyezhek dre gumun ha dre zepartamant, ennañ chomlec'h, niverenn bellgomz ha posteler pep skol, klikit amañ.
Kavit ho skol divyezhek war ur gartenn etreoberiat
Ar c'helenn divyezhek
Bez' ez eus meur a zoare da zeskiñ brezhoneg hag a glot gant ezhommoù difer ha tud disheñvel. Er penn a-raok emañ ar c'helenn divyezhek galleg-brezhoneg, a c'haller gantañ stummañ brezhonegerien da vat. Sellet a ra ouzh tost 20.000 skoliad e-barzh 214 kumun ha 702 skol. Abaoe digoradur al lec'hienn divyezhek kentañ, tost 50 vloaz zo, eo aet war greskiñ kalz hag en em ledet eo er vro. Stankoc'h-stank eo rouedad ar c'humunioù a zo ul lec'hienn divyezhek enno d'an nebeutañ.
Tri hentad divyezhek zo : ar skolioù Diwan, klasoù divyezhek an deskadurezh publik ha re an deskadurezh katolik.
Gant Diwan e oa bet digoret ar skol-vamm gentañ e 1977.
Abaoe 1982 ez eus klasoù divyezhek e skolioù an Deskadurezh-Stad. Kelennet e vez e brezhoneg hag e galleg gant ar pal “mestroniañ kenkoulz an div yezh”. Ar Rektorelezh hag an OPAB a labour diouzh ur protokol digeriñ evit sevel hentadoù divyezhek nevez er 1añ derez publik.
Abaoe 1990 ez eus bet digoret klasoù gant an Deskadurezh Katolik. Mont a reont en-dro en div yezh ivez.
Ouzhpenn un danvez studi eo ar brezhoneg er c'hlasoù divyezhek, ur yezh hag a vez desket drezi eo da gentañ-penn eus ar skol-vamm betek al lise. Heñvel eo ar programmoù kelenn ouzh ar c'hlasoù pe ar skolioù all.
Muioc'h-mui a dud a laka o bugale en hentadoù divyezhek pa zeuont da gompren e roer evel-se ar pep gwellañ dezho evit ober berzh en o buhez diwezhatoc'h. Ma fell deoc'h gouzout hiroc'h war perzhioù mat an divyezhegezh er skol e c'hallit lenn ar blaketenn-mañ.
Skolajoù ha liseoù gant hentadoù divyezhek
Ar c'helenn brezhoneg
Ar skolidi eus ar 1añ hag an 2l derez ha n'emaint ket en un hentad divyezhek a c'hall deskiñ brezhoneg e daou zoare. An hollekaat lakaet da bal el lezenn bet votet d'an 21/05/2021 zo lakaet e plas e 30 skolaj el live 6vet en akademiezh Roazhon.
Gant ar gartenn amañ dindan e c'hellot kavout ar skolajoù hag al liseoù da zeskiñ brezhoneg.
Gallout a reer lakaat ar brezhoneg da gontañ evit ar breved hag ar vachelouriezh. Evit gouzout hiroc'h war ar c'hentelioù war zibab sellit ouzh ar blegfollenn-mañ.
Kartenn skolajoù ha liseoù - danvez dibab ha Yezh vev
Mont da gelenner
Pellgargit amañ ar blegfollenn savet gant OPAB hag ar Rektorelezh
Bep bloaz e kresk an niver a gelennerien vrezhonek
Evit kregiñ gant e vicher evel kelenner divyezhek
Evel an holl gelennerien all e rank ar gelennerien divyezhek bezañ tapet un Aotreegezh evit gallout lakaat o anv er genstrivadeg da vont da gelenner.
Aotreegezhioù a-ratozh zo bet savet evit prientiñ ar CRPE e Brest hag e Roazhon. Un DU zo ivez.
Mat eo gouzout ez eus Masterioù arbennikaet war ar c’helenn divyezhek e EBUKed Breizh evit ar publik, e Kelenn evit Diwan hag en EUSGeK evit an deskadurezh katolik.
Ar re zo un aotreegezh ganto (pe a zo enskrivet en aotreegezh 3) a c’hall lakaat o anv er genstrivadeg a-ratozh evit an hentadoù divyezhek er 1añ derez ; evit an eil derez ez eus ur genstrivadeg CAPES brezhoneg (CAFEP evit Diwan hag an Deskadurezh katolik).
Kelennerien ditlet : mont gant an divyezhegezh ?
Bep bloaz e vez divizet gant kelennerien ditlet tremen eus an hentadoù unyezhek d’an hentadoù divyezhek. Evito ez eo un doare da reiñ startijenn d’o red-micher en-dro goude meur a vloavezh kelenn en ur yezh nemetken.
Meur a zoare zo da dremen d’an divyezhegezh :
- Ma ouzit brezhoneg dija e c’hallit lakaat ho parregezhioù yezh da vezañ anavezet dre an Ensellerien. Gallout a rit tremen un diplom-Stad ivez, an Diplom Barregezh war ar Yezh (DBY) da c’houzout resisoc'h peseurt live brezhoneg hoc'h eus, hervez framm dave boutin Europa.
- Ma ne gomzit ket brezhoneg ez eus tu da vezañ stummet war ar yezh dre ar stummadur micherel : efedus-tre eo evit deskiñ ar yezh en ur ober 6 pe 9 miz. Koust ar stummadurioù-se zo kemeret e karg penn-da-benn gant ar strollegezhioù tiriadel ha miret e vo ho kopr kriz ma tennit splet eus ar stignad “Diskarg Stummañ Dibaouez” lakaet da dalvezout en akademiezhioù Roazhon ha Naoned. Un ehan-stummañ a c’hell bezañ goulennet mod all.
Ar sikourioù arc’hant
Skoazell zo ur sikour hiniennel roet gant Kuzul-Rannvro Breizh da skoazellañ ar re a laka o anv en ur PPPE/LPE pe en ur Master “Deskadurezh divyezhek”.
“Desk/Kelenn” zo ur mod all da vezañ skoazellet. Yalc’hadoù eo evit an danvez kelennerien a heuilh ur stummadur (rakvicherel pe vicherel) ha d’ar gelennerien a ya da heuliañ stajoù hir da zeskiñ brezhoneg pe da wellaat o yezh. Betek 4500 euro a c’hall bezañ roet gant Kuzul-rannvro Breizh, kuzul-departamant Penn-ar-Bed, Aoadoù-an-Arvor hag hini ar Mor-Bihan. Evit lakaat hoc’h anv, kit e darempred gant an Ofis Publik.
Dafar kelenn
TES :
Ti-Embann ar Skolioù zo ur skourr eus KRDK Breizh. Karget eo da sevel ha da embann an dafar pedagogel rekis evit kelenn ar brezhoneg pe e brezhoneg. Ul lec'hienn internet zo evit pellgargañ pe urzhiañ dafar-kelenn.
Blogoù pedagogel :
• Kostimatisto : ur blog ennañ dafar ha preder pedagogel evit kelennerien ar c'hentañ derez.
Heuilhit ac'hanomp war
