Lañser | Endalc'had | Enklask | Darempredoù

Facebook e brezhoneg

Web gwelet en he brasañ

Teknologiezhioù nevez 06/10/2014

Ofisiel eo. Divizet eo bet gant an dud karget eus Facebook ouzhpennañ ar brezhoneg d'ar roll yezhoù a c'hallor dibab implijout war ar rouedad sokial-mañ implijet gant kant milionoù a dud er bed a-bezh.

Eürus-bras eo Ofis publik ar brezhoneg gant an diviz-se, hep mar ebet ur sin a anaoudegezh vras evit hor yezh. Setu bremañ ar brezhoneg e-mesk an 121 yezh kinniget gant Facebook. Evit kemer perzh en treiñ eo ret kaout ur gont Facebook mont war ar bajenn-mañ ha dibab "brezhoneg".

Kement-se zo ur merk a fiziañs kreñv-tre e dazont ar yezh evit an holl rummadoù brezhonegerien yaouank.

Gourc'hemennoù a gasomp da dud Facebook omp bet e darempred ganto abaoe tost tri bloaz evit kas an teuliad meur-mañ da benn vat. Gourc'hemennoù a lavaromp ivez d'ar miliadoù a dud (tost 15 000) a oa emezelet er strollad «Facebook e brezhoneg» dindan un nebeud sizhunvezhioù hepken hag o deus kendalc'het da reiñ lusk ha da zerc'hel ar strollad-mañ bev abaoe 2011.

An trec'h-mañ a ya d'ober, sur ha n'eo ket marteze, an araokadenn vrasañ evit plas hor yezh war ar Genrouedad abaoe ma oa bet savet stumm brezhoneg an holloueziadur Wikipedia e 2004.

Gant savidigezh ar pik .bzh ez eo ar bloaz 2014 ur bloavezh eus ar c'hentañ troc'h evit ar pezh a sell ouzh sked ar brezhoneg war ar gwiad.

distreiñ da roll ar c'heleier

Kas a ran ma soñj

0 evezhiadenn

An evezhiadennoù0